منکرینِ کمالاتِ نبوت اور منقصینِ شانِ رسالت (شانِ رسالت گھٹانے والے)سے ہمیں طبعی تنفر (فطری نفرت)ہے۔

Gustakhan e Rasool se hum bezaar hein

تخلیق ِانسانی کا مقصد معرفتِ الہی ہے اور معرفت ِالہی کا مبنیٰ ( بنیاد ) مشاہدۂِ تجلیات ِحسنِ لامتناہی (خدائے تعالیٰ کے لامحدود حسن کی تجلیات کا مشاہدہ کرنا)۔
اس مقصدِ عظیم کے تصور نے انسان کو ورطۂ حیرت (انتہائی حیرت کی حالت میں ) میں مبتلا کر دیا ۔
وہ ایک ایسے ضعیف ونادار اجنبی مسافر کی طرح حیران تھا جسے کروڑوں میل کی دشوار گزار راہیں درپیش ہوں اور منزلِ مقصود تک پہنچنے کا کوئی ذریعہ اس کے پاس موجود نہ ہو۔
وہ عالمِ حیرت میں زبانِ حال سے کہتا تھا :
الہی!تیری معرفت کی منزل تک کیسے پہنچوں ؟
میں کمزور ضعیف البنیان (پیدائشی کمزور) اور پھر مجھے بہکانے کے لئے قدم قدم پر شیطان ۔وہ پریشان ہو کر سوچتا تھا کہ ضعف کو قوت سے کیا نسبت ، امکان (مخلوق ) کو وجوب (خالق)سے کیا واسطہ، محدود کو غیر محدود سے کیا علاقہ ،کہاں حادث (نئی چیز جو پہلے نہ ہو،فانی) کہاں قدیم، کہاں انسان کہاں رحمن ،نہ اس کے حسن وجمال کی تجلیوں تک میری نگاہیں پہنچ سکتی ہیں ، نہ میں اس کے دیدارِ جمال کی تاب لاسکتا ہوں۔
انسان اسی کش مکش میں مبتلا تھا کہ قدرت نے بروقت اس کی دستگیری فرمائی اور روح ِدو عالم حضرت محمدصلَّی اللہ تعالٰی علیہ واٰلہٖ وسلَّم کے آئینۂ وجود سے اپنے حسن ِلامحدود کی تجلیاں ظاہر فرما کر اپنی معرفت کی راہیں اس پر روشن کر دیں۔ ( یعنی اللہ تعالیٰ نے نبی ٔ کریم صلَّی اللہ تعالٰی علیہ واٰلہٖ وسلَّم کواپنی ذات و صفات کا مظہرِ اتم بنا کر انسان پر اپنی معرفت کی راہیں کھول دیں کہ جس نے رب کے حسن و جمال اور قدرت کو دیکھنا ہووہ حضورصلَّی اللہ تعالٰی علیہ واٰلہٖ وسلَّم کو دیکھ لے۔)
صلوۃ وسلام ہو اس برزخِ کبریٰ (برزخ سے مراد وہ شیٔ جو دو اشیا کے درمیان واسطہ ہوچونکہ سرکار علیہ السلام خالق اور مخلوق کے درمیان واسطہ ہیں لہذا حقیقتِ محمدی برزخ ہے۔ ) حضرت محمد مصطفی علیہ وآلہ التحیۃ والثناء پر جس نے؛
- ضعف ِانسانی کو قوت سے بدل دیا۔
- حدوث کو قدیم کا آئینہ بنادیا ۔
- امکان کو بارگاہ ِ وجوب میں حاضر کر دیا ۔
- مکان کا رشتہ لامکان سے جوڑ دیا۔ محدود کو غیر محدود سے ملا دیا یعنی بندہ کو خدا تک پہنچا دیا۔
حق یہ ہے کہ
رخسارِ محمدی آئینہ ٔجمالِ حق ہے اور خدوخالِ مصطفی مظہرِحسنِ کبریا ۔ (یعنی حضورعلیہ السلام کا حسن و جمال اور صفات اللہ تعالیٰ کے حسن و جمال اور صفات کا مظہر ہیں۔) پھر کس طرح ممکن ہے کہ ایک کا انکار دوسرے کے اقرار کے ساتھ جمع ہو جائے۔
اگر حق کے ساتھ باطل ، نور کے ساتھ ظلمت، کفر کے ساتھ اسلام کا اجتماع متصور ہو تویہ بھی (یعنی حضور صلَّی اللہ تعالٰی علیہ واٰلہٖ وسلَّمکا انکار اللہ تعالی کا انکار نہ ہو۔ ) ممکن ہو گا۔ جب وہ محال ہے تویہ بھی محال ۔
بنابریں اس حقیقت کو تسلیم کرنے کے سوا کوئی چارہ ہی نہیں کہ
حسنِ محمدی کا انکار جمالِ خداوندی کا انکار اور بارگاۂِ نبوت کی توہین حضرتِ الوہیت (شانِ خداوندی) کی تنقیص ہے۔
شان ِالوہیت کی توہین کرنے والا مؤمن نہیں تو گستاخِ نبوت کیونکر مسلمان ہو سکتاہے۔
کوئی مکتبۂ خیال (فرقہ) ہو ہمیں کسی سے عناد نہیں البتہ منکرینِ کمالاتِ نبوت اور منقصینِ شانِ رسالت (شانِ رسالت گھٹانے والے)سے ہمیں طبعی تنفر (فطری نفرت)ہے۔
اس لئے کہ وہ آئینۂ جمالِ الوہیت میں عیب کے متلاشی ہیں اور ان کا یہ طرزِ عمل نہ صرف مقصدِ تخلیقِ انسانی کے منافی ہے بلکہ آدابِ بندگی کے بھی خلاف اور خالقِ کائنات سے کھلی بغاوت کے مترادف ہے۔