فریاد اُمَّتی جو کرے حالِ زار میں ٭٭٭٭٭٭٭ مُمکن نہیں کہ خَیْرِ بَشر کو خبر نہ ہو

Faryaad Ummati jo kar-e-Hal-e

سرکارِ مدینہ، راحتِ قلب وسینہ، فیضِ گنجینہ ، صاحِبِ مُعطَّر پسینہ صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ کا فرمانِ شَفاعت نِشان ہے۔

بے شک اللہ عَزَّ وَجَلَّ نے ایک فِرِشتہ میری قَبْرپر مُقرَّر فرمایا ہے۔
جسے تمام مَخلُوق کی آوازیں سُننے کی طاقَت عطا فرمائی ہے،
پس قِیامت تک جوکوئی مجھ پر دُرُودِپاک پڑھتا ہے تو وہ مجھے اُس کااور اُسکے باپ کا نام پیش کرتاہے۔
کہتاہے،فُلاں بن فُلاں نے آپ صَلَّی اللّٰہُ تَعَالٰی عَلَیْہِ واٰلِہٖ وَسَلَّمَپر دُرُودِپاک پڑھا ہے۔
===============
''(مجمع الزوائد، کتاب الادعیۃ، باب فی الصلاۃ علی النبی۔۔۔۔۔۔الخ،١٠/٢٥١، حدیث:٩١١٧٢)
---------------------------------------
فِرِشتے کی قُوَّتِ سَماعت

سُبْحٰنَ اللہ عَزَّ وَجَلَّ !
دُرُود شریف پڑھنے والا کس قَدَربَخْتْوَرہے کہ
اُس کانام مع وَلدِیَّت بارگاہِ رِسالت میں پیش کیا جاتا ہے ۔

یہاں یہ نُکتہ بھی اِنتہائی اِیمان اَفروز ہے کہ

قَبْرِ مُنوَّرعَلیٰ صِاحِبِھَا الصَّلوٰۃُ وَالسَّلام پر حاضِرفِرِشتے کو اس قَدَر زِیادہ قُوَّتِ سَماعت دی گئی ہے کہ
وہ دُنیا کے کونے کونے میں ایک ہی وَقْت کے اَندر دُرُودشریف پڑھنے والے لاکھوں مُسلمانوں کی اِنْتِہائی دِھیمی آواز بھی سُن لیتاہے
اور
اسے عِلْمِ غَیْب بھی عطا کیا گیا ہے کہ
وہ دُرُودِ پاک پڑھنے والوں کے نام بلکہ ان کے والِد صاحِبان تک کے نام جان لیتا ہے۔
جب خادِمِ دربارِ رِسالت کی قُوَّتِ سَماعت اورعِلْمِ غَیْب کا یہ حال ہے تومکّے مدینے کے تاجدار، محبوبِ پروَرْدَگارصَلَّی اللّٰہُ تَعَالٰی عَلَیْہِ واٰلِہٖ وَسَلَّمَ کے اِختیارات و عِلْمِ غَیْب کی کیا شان ہوگی!
وہ کیوں نہ اپنے غُلاموں کو پہچانیں گے اور کیوں نہ اُن کی فریاد سُن کربِاِذْنِ اللّٰہ تَعالٰی (یعنی اللہ کے حکم سے) اِمداد فرمائیں گے!

فریاد اُمَّتی جو کرے حالِ زار میں
مُمکن نہیں کہ خَیْرِ بَشر کو خبر نہ ہو

(حدائقِ بخشش،ص١٣٠)
=================
صَلُّوْا عَلَی الْحَبِیْب! صَلَّی اللّٰہُ تَعَالٰی عَلٰی مُحَمَّدٍ